આ દરમ્યાન આખા ગુજરાતની પોસ્ટ ઓફિસોને પણ આ મેઇલ ફોરવર્ડ થતાં ગેરસમજ ઉભી થઈ હતી. જેથી સુરક્ષા એજન્સીએ ગુજરાત ભરમાં આવેલા પાસપોર્ટ સેવા કેન્દ્રો પર એલર્ટ જાહેર કરી સુરક્ષાના ભાગરૂપે મહેસાણા, છોટાઉદેપુર, સુરત, નવસારી, વલસાડ, સુરેન્દ્રનગર, જૂનાગઢ અને અમરેલી સહિતના મોટાભાગના શહેરમાં સઘન તપાસ શરૂ કરી હતી. ત્યારે આ મેસેજ ગાંધીનગર પહોંચતા જ ગાંધીનગરમાં પણ ભારે દોડધામ મચી હતી.
ગાંધીનગર બ્રાન્ચ સુધી “ગાંધીનગર પોસ્ટ ઓફિસને બોમ્બથી ઉડાવી દેવાની ધમકી” તરીકે સંદેશ સર્ક્યુલેટ થયો હતો. પરિણામે શહેરમાં થોડીવાર માટે પેનિક જેવી પરિસ્થિતિ સર્જાઈ હતી. આ ઉપરાંત ગાંધીનગર સિવિલ હોસ્પિટલમાં આવેલ બોયઝ હોસ્ટેલને પણ બોમ્બ થ્રેટ મળ્યાની જાણ થતાં તંત્ર તાત્કાલિક હરકતમાં આવ્યું હતું. ધમકી મળતા જ હોસ્ટેલ ખાલી કરાવી તમામ વિદ્યાર્થીઓને નીચે ઉતારવામાં આવ્યા હતા અને પોલીસ તથા બોમ્બ સ્ક્વોડની ટીમોએ સ્થળ પર પહોંચી સર્ચ ઓપરેશન હાથ ધર્યું હતું. જોકે પ્રાથમિક તપાસમાં કોઈ શંકાસ્પદ વસ્તુ મળી આવી નથી, છતાં સુરક્ષાના હેતુસર ચેકિંગ પ્રક્રિયા હાથ ધરાઈ હતી.
બાદમાં આ મામલે પોલીસની તપાસમાં સ્પષ્ટ થયું કે, આ મેઈલ આઉટલુકમાંથી આવ્યો હતો, જેમાં માત્ર સુરત આરટીઓ ઓફિસ અને સુરત રિજનલ પાસપોર્ટ ઓફિસને જ ધમકી આપવામાં આવી હતી. ગાંધીનગર અથવા અન્ય કોઈ સ્થળનો સીધો ઉલ્લેખ નહોતો. જેથી એક ગેરસમજ અને ફોરવર્ડ મેસેજના કારણે આ પ્રકારની પરિસ્થિતિ ઊભી થઈ હતી.
